上期講到工業企業喺海外增產嘅趨勢，今期就承接上期話題，皆因有能力喺全世界靈活選擇生產地嘅企業，更有機會成為王者。成本可以係股價決定性關鍵，再講，生產選址決定因素，絕非人工、地價成本、稅率咁簡單，有穩定優質嘅水電運輸等基建設施，以及有冇足夠人才，同埋選址是否靠近銷售點，亦係重點。
企業透過海外擴張產能嚟拉低新生產、銷售成本，成效會較快體現於業績以上。經典例子係福耀玻璃（3606），2011年開始，新增產能選址俄羅斯同美國，生產地靠近產品最終銷售點，可以節省唔少運輸成本，即使美國人工高，但計得掂條數，除笨有精，亦令福耀玻璃生產成本逐漸下降，換來穩定盈利增長。
由2012年至今，福耀玻璃毛利率連續5年擴闊，由36.2%升到42%，純利率由15.7%升到18.9%，純利同樣連升5年，每股盈利由0.76人民幣，升到1.25人民幣，盈利增長趨勢變得平穩，投資者自然給予增長股估值，現價預測2017年市盈率18倍，股價仲喺上升趨勢中。
講到呢到，福耀固然係值得投資嘅股份，但下期就講吓信義玻璃（868），皆因股價上升空間可能更大。
晉佳
http://www.fb.com/advanceguy1
本欄逢周一、三、五刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk