做高齡媽媽生育風險高，分分鐘個仔未大學畢業已經兩鬢班白，不過隨住香港主會發展，大學畢業已經廿二三歲，打拼幾年養家已經三十歲都仲未有時間拍拖，高齡產婦亦都愈來愈普遍，九十年代同黃子華拍過拖嘅潘芳芳雖然最後戀情未能開花結果，但05年就同導演陳冠豪結婚，同年意外懷孕，以43歲高齡產下一子，阿仔今年已經11歲。而娛樂圈中高齡產婦亦仲有好幾位。
林青霞
現年62歲嘅林青霞，曾經同秦祥林及秦漢拍拖，1994年6月同香港富商邢李㷧喺美國結婚，其後暫別影壇，隨夫居於香港，其後分別以42及47歲高齡順利誕下大女邢愛林及細女邢言愛，兩女現時分別21及15歲。
伊能靜
48歲嘅伊能靜同相差7歲嘅庾澄慶（哈林）婚後於02年產下一子，09年離婚後，15年同細佢十歲嘅大陸演員秦昊結婚，16年中喺美國以47歲高齡產下一女，不過坐月期間，伊能靜嘅傷口裂開，含膿發臭需再開刀做手術好彩最後冇事。
朱麗倩
華仔同朱麗倩一路都被傳有仔女，08年結婚之後，外界一路非常期待，直到12年當時46歲嘅朱麗倩喺養和醫院誕下女兒劉向蕙。
劉若英
現年47歲嘅劉若英11年同大陸商人鍾小江結婚，15年1月當時45歲嘅佢為丈夫誕下一子。