商務及經濟發展局局長蘇錦樑（Greg So）一早講明唔會留任，近排密密喺fb貼佢外訪同出席各大小活動，結果有網媒引述政界人士猜測，佢想顯示有強勁商界人脈，為加入商界鋪路。早年有show卡片前科嘅Greg So，噚日即喺fb澄清，話自己一向有將參加活動喺fb發文，強調唔係要show人脈，仲自嘲講商界人脈關係「未有耐到我啦」。
雖然Greg So話自己唔係show人脈，但唔知係咪臨別在即，Greg So呢幾個月來出po又真係好密，有時一個活動出幾個po，有文有相之餘，仲有埋片，難怪有人會咁諗！而Greg So喺fb發文解釋，話平日有去開佢fb朋友，知佢一向有喺fb分享見聞，最近其實同之前冇乜分別，至於話佢show人脈，話有乜龐大本地商界同國際人脈關係，Greg So話人脈關係晒冷一定唔係佢，仲自嘲「未有耐到我啦」！
休息一年與妻旅行
其實之前Greg So話過，唔做官之後要休息一年，同太太去旅行，所以佢就算入商界都未必會係一年半載嘅事，不過佢同佢副手梁敬國，已經密密將fb當紀念冊用，提早同各方告別，好似梁敬國之前喺fb貼咗張同一班副局自拍「畢業相」，而Greg So早排亦喺fb貼咗幾張佢喺政總辦公室外風景相，話自己平日好少望，諗起仲有一個月就要同工作多嘅同事告別，話日後會好掛住佢哋。
李八方
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk