候任特首林鄭月娥搞咗成兩個月，下任班子終於有啲眉目，佢個組班噩夢，可以告一段落喇啩？！之不過若同5年前嘅梁振英相比，林鄭真係大落後，事關當年梁振英喺呢個時期，已經公開招聘緊副局長同政助，當然大家絕對唔可以忽略，此一時、彼一時嘅問題嘅！
副局政助齊唔齊章，查實都係後話，反正梁振英當年上任嘅時候，副局政助都未齊腳，但有一件事係正印局長齊腳之後要諗嘅，就係署任問題，最近有政府中人喺度諗，按照新班子嘅名單排位，署任司長嘅人選，究竟會變成點？
資歷壓劉華楊偉雄
就以政務司司長（CS）為例，雖然張建宗標榜自己9年唔放假，但唔放假唔代表唔外訪嘛，一旦盛傳留任司長嘅佢去外訪，邊個頂佢個位呢？官場規矩係由佢管轄嘅問責局長當中，資歷最深嗰位嚟做，數來數去，人選竟然係……大嘥鬼……Oh，講清楚，係環境局局長黃錦星至真。
政府中人話，大家數吓個名單就知，傳聞中嘅下任局長唔少都係現屆副局，換言之去到下屆就係新丁，以局長身份過渡嘅只有黃錦星、民政局長劉江華同創科局局長楊偉雄，但劉、楊都係半途加入，所以將來張建宗行開行埋，大嘥鬼就係署理司長嘞，係咪有啲喜感呢？
有政府中人講笑話，其實大嘥鬼升呢都冇乜事嘅，皆因候任特首林鄭係凡事一手抓嘅領導，無處不在、處處都在，署任司長都係掛名箒，唔使擔心會出事嘅！
花生友
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk