現年54歲的資深藝人潘芳芳平實是福，05年閃嫁重逢的20年舊同學、電台DJ陳冠豪，翌年以43歲高齡做媽媽，兩人的獨子陳健御已經11歲，日前一家三口現身中環ifc行超市買麵包，芳芳蹺實老公幸福滿瀉，三人在店內各自揀心頭好，之後一家三口在商場行了兩個圈，就到停車場取車離去。
學校攞演員獎
潘芳芳昨接受本報電話訪問，對於當年做高齡產婦，問到會否擔心跟兒子有代溝？她說：「我覺得年紀唔緊要，最緊要點同佢相處，唯一年紀大咗，精力體力上要兼顧工作，做媽咪始終要分時間畀小朋友，尤其最初幾年要陪多啲，到佢成長溝通冇咁大隔膜。」為甚麼當年不再追多個？她說：「呢個上天安排，我四十幾歲生佢，都係冇預期，年紀大懷孕機會低，有時唔係你想就有。」
問到囝囝讀書辛苦嗎？潘芳芳笑說：「佢自己會處理功課，考試會承擔溫書，佢又冇壓力。英文科比較成績好，學校有戲劇班，佢攞過傑出演員獎，仲有服務獎、學業進步獎。」問到兒子是否遺傳了她的演藝細胞？潘芳芳笑說：「我唔知道，可能咁啱角色發揮好，成日同佢強調戲劇係team work。」不會做怪獸家長？她坦言：「我唔想佢覺得考試讀書大壓力辛苦，家長逼唔到咁多，佢都有補吓數學，其他學游水、音樂、書法、畫畫，都係佢興趣。」
冇同老公拗撬
談到夫妻相處之道，芳芳坦言：「咁多年我同先生感情都OK，最緊要溝通，我哋過咗拗撬年紀。」記者笑言最緊要沒第三者，她笑說：「呢樣好難包，講雙方關係點維繫，有時我都信第三者嘅出現，可能夫妻關係係潛藏問題，我哋又冇呢啲事，我哋成日對住，冇第三者埋到身。」
採訪、攝影：朱志聰