佘詩曼噚日42歲生日，約好粉絲以粵語、普通話同英語玩facebook及微博直播，不過直播前半小時，佢分別貼咗張右眼包紮紗布同接受眼科檢查嘅相。阿佘遲咗半個小時開騷，佢以「獨眼龍」造型現身，同粉絲大呻右眼傷勢：「好慘，唔知做乜鬼整親眼，今朝起身發炎，去咗醫院睇醫生，醫生話細菌感染。」阿佘透露前晚同好友飯局飲酒慶祝生日，更講笑可能被朋友「插」傷眼，要搵真兇。
以為眼角膜脫落
直播中，阿佘不時嗌痛，一時話眼球似被𠝹爛，一時以為眼角膜脫落，更揭起紗布畀粉絲望佢右眼傷勢，當中見到右眼唔可以睜大同眼部紅腫。其間，阿佘要滴眼藥水同閉目休息，又不忘讚自己天生麗質，佢話：「冇咗一隻眼都咁神采飛揚，覺得自己今年衰嘢發生晒，因為今日頂晒成年，嚟緊會一帆風順。」
阿佘即場拆粉絲同朋友送嘅禮物，當中有「一生幸福」清酒、相架擺設，仲有粉絲整咗佢嘅愛犬圖畫，而阿佘抱住愛犬出鏡錫錫。講到工作，佢透露下個月頭會去檳城拍戲，不過同時有人搵佢返內地拍宮廷戲做奸妃，所以佢度期中。
撰文：馮仁昭
