咩嘢叫人馬合拍？騎9次得1冠4亞2季，雖然只贏一次，但上名率約78%，當然算合拍啦，所講嘅係雷神莫雷拉與大摩馬房的「有禮」。
「有禮」唯一頭馬，就是上季由雷神贏四班泥地1200米，可惜隻馬今季問題多多，曾分別因為頭部撞到閘廂前門、兩邊鼻孔被發現有大量膿痰，以及左前腳受傷，搞到季內三度於排位後退出賽事，今季仍未建功。
不過，可能上仗「有禮」配祈普敦角逐盲門田草1200米，35倍冇人睇好，都輕鬆拼入第四，顯示隻馬有分在手關係，吸引到雷神眼球，所以賽後雷神立即取回「有禮」的帥權，並三度為此駒快跳操練，明顯對此駒非常重視。
本周三（31日）沙田泥地夜馬，「有禮」將由雷神執韁，回師唯一勝途四班泥地1200米，馬兒近期咁受操，毫無疑問腳患受控，健康大有起色，有望取得服役生涯第二Win。