香港時間昨日凌晨上演嘅阿仙奴對車路士呢場英格蘭足總盃決賽，唔少港人捱眼瞓睇，而呢期有份演大台劇《不懂撒嬌的女人》做「游生」嘅袁文傑，現身大台講波，袁文傑本身係阿仙奴死忠fans，又做YouTube球星台《傑出阿仙奴》主持，愛隊出戰，講波經冇難度，唔少網民讚佢講得唔錯!
至於，另一焦點就係有「荷蘭叻」之稱嘅陳百祥（阿叻）講「國歌」……
話說係咁，當時啲球員出嚟之前，威廉王子有出過嚟，同啲球員握手，「萬能鍾」鍾志光笑住同陳百祥講：「叻哥！呢個係咪你老友呀？」陳百祥即話：「我哋回歸咗……」跟住女歌手Emily Haig準備領唱《God Save the Queen》嗰陣，陳百祥爆咗句：「為我哋唱國歌！」
唔少網民反問陳百祥又話回歸，乜《God Save the Queen》係中國國歌咩!?連高登推到完場嘅post都有唔少人講陳百祥話唱國歌呢件事，「荷蘭叻：『為我哋唱國歌!』反了反了，我都笑咗」、「有冇人去投訴唔愛國」。
另外，有網民就問點解鍾志光係咁嗌袁文傑做「游生」，係唔係唔記得人哋個真名，亦有人為鍾志光解圍：「叫文傑又唔多順口!」