笑到最後:樓災發生前有先兆 - 高明

笑到最後:
樓災發生前有先兆 - 高明

2016年11月6日,本欄預言樓價未來一年再升一成,中原指數見158點。2017年5月26日,中原城市領先指數見158.26點。到價!
7個月前,政府宣佈港人買入第二層樓嘅雙重印花稅(DSD)劃一徵收15%,當日高明話客觀效果只係收緊二手供應,令到發展商喺一手市場任意嘜價,樓價再升係必然嘅事。從動機去睇,政府都冇誘因去推冧樓市協助未上車嘅人,以為加辣係幫小市民嘅人,實在一廂情願得太耐,導致咁多年嚟錯過樓市升幅。

高明喺樓市上預測到價,但因為辣招、買樓規限太多,明知佢升,都冇機會賺,淨係劃一15%印花稅,樓價升一成都要倒貼5%;即使係現有持貨者,樓價升唔停,加上辣招太過煩瑣,真係肯獲利嘅人有限。惟一有機會獲利就係加按套現再投資,等於加大槓桿再賭,要下一鋪再贏先至真正獲利,但就增加沒頂風險。
最近新盤海之戀賣樓排到人山人海,有電視台將97年灝景灣同今日比較,由人龍到買樓人士講嘅嘢都係一模一樣。回想90年代香港連郵票、紙幣都有炒風,今日香港人嘅賭性已經算克制。本欄唔相信樓市無緣無故會爆破,至少爭一樣嘢,就係股市大牛市。

2015年大牛市,但未見大規模樓災,真正原因係股市升嘅時間太短,散戶高位見人哋炒股發財,諗住去銀行加按炒股,搞得手續嚟A股已股災,加上都冇乜人失業,繼續供得起樓,樓市只係小規模調整。
今年港股小時代,升幅集中晒喺騰訊(700),唔算好有效咁引人入場。倘若港股重上三萬點樓上,並維持三個月以上,有足夠時間按樓,並且喺高位買股票,到時樓災可以話必然會發生。
不過喺呢件事之前,一手繼續主導樓市,高位繼續上升機會更大。如果𠵱家夾硬要上車,最好準備18個月供樓資金,因為參考當時講到世界末日嘅2008年金融海嘯,股市由2007年10月高位一路跌到2009年3月,跌足18個月反彈,樓市亦都跟住彈,證明世界唔會末日,但低位被人斬倉就好難翻身。

高明
http://www.fb.com/bigricetea
本欄逢周一刊出

97年主權移交至今,香港前進還是倒退?「蘋果」與你細數廿載風雨。
【回歸二十年】專頁: http://hksar20.appledaily.com.hk