車路士有英超，阿仙奴有英足盃，曼聯有英聯盃，熱刺有賽馬會傑志中心挑戰盃，咁曼城有乜盃？真係乜都冇，四大皆空囉！曼城舊年夏天重金禮聘哥迪奧拿嚟教，同佢簽三年，使咗超過一億鎊買人，但乜盃都冇，令人幾失望。不過，曼城對哥帥好有信心，據英媒講，會方諗住開份新約畀哥帥，仲全力支持佢喺今夏轉會市場大展拳腳。曼城早幾日已經由摩納哥簽入翼鋒貝拿度施華，據聞佢哋仲想喺摩納哥買埋左閘班捷文文迪。
哥迪奧拿亦都好關心門將位置，佢放走咗今季聯賽正選嘅韋利卡巴尼路，家陣曼城得番哥迪奧巴禾同埋赫特兩個龍，前者派膠派到出晒面；後者就唔得哥帥歡心。雖然有傳哥帥會同赫特和解，下季請佢返嚟，但更多報道講，哥帥睇中咗賓菲加門將艾達臣摩拉斯。不過相信轉會費要喺3,800萬鎊（約3.8億港元）先肯放行。