所謂拳怕少壯，20歲南非新人王騎師麥偉利今日（28日）在沙田馬場技驚四座。身為全港現役最年輕騎師嘅佢，於第八場沙田銀瓶1200米三級賽，策騎全場最冷達89倍沈集成馬房的「永旺年年」，恃住輕磅之助力壓一眾重磅熱門馬，單Win及組合獨贏（3揀1）A3分別派897.5及77元，勝出練馬師開B3「其他」派136.5元。
5歲馬「永旺年年」季初於同一途程田草1200米由雷神贏特首盃，之後冇再贏過，本身亦從未於分級賽上名，一直予人印象只是普通一班馬，未夠實力衝擊分級賽。
然而，「永旺年年」呢次與麥偉利首度合作，孭115磅從第8檔起步，沿途守第二位緊隨放頭馬「發盈喜」，直路最先發難，末段雖受後面馬匹逼前挑戰，但麥偉利施展渾身解數全力催策，「永旺年年」得以保持勁勢率先衝線，贏0.75馬位，爆大冷攻下本屆沙田銀瓶三級賽，而騎練亦告首度攜手揚威凱旋門。
麥偉利個人在港初跑分級賽即勝出「永旺年年」，兼連續第二個賽日贏馬，成功打出名堂。沈集成今日連同頭場由雷神贏大熱門「綠色勁駒」，起孖兼捧盃打造個人近期代表作。而「永旺年年」累積8捷，田草1200及谷草1200米各贏四場。
第八場前四名冷熱互見，次熱「翩翩」後上不及做阿二，鞍上人蘇兆輝重臨客串一日算有交代，第三名為史卓豐冷馬「澳斯卡」，第四名至係大熱門「駿皇綵」，四重彩派近十萬元。