全國人大委員長張德江早前喺一個《基本法》實施20周年座談會上，明言要香港就《基本法》23條立法，又話管治班子必須要由愛國者組成等，噚日候任特首林鄭月娥出席香港廣西社團總會主辦嘅「活力慶回歸，全城八段錦活動」，都有被追問任內會否就23條立法、組班等問題，不過她主持完活動啟動禮就急急腳走人，連八段錦都冇打就走，總之記者點追問佢都封口唔回應。
之後「接力」現身嘅有民望高，食物及衞生局局長高永文，作為主禮嘉賓之一，佢梗係有一齊跟師傅耍吓八段錦，耍得有紋有路，一啲唔失禮，而佢出席呢個活動嘅另一「任務」，似乎係被一眾參加者集郵，個個人可能知佢唔做局長，爭住同佢合照，真係同薯片叔叔曾俊華有得揮！到佢主禮完咗離開時，仲不停被市民叫停，要求同佢合照，搞到民望高走極都未走到呀。
講番個活動，逾4,000人同場耍八段錦，最終96%參加者有效完成，成功破咗最多人同時進行八段錦學習班嘅健力士世界紀錄。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk