英超球季完咗，曼聯領隊摩連奴話佢嚟緊兩個月食住花生，同球迷一齊睇曼聯執行副主席活華特表演，唔知活華特可以簽到咩球星返嚟呢？伊巴謙莫域同朗尼好大機會一齊離隊，係人都知紅魔呢個夏天求鋒心切，但呢幾日傳得最行嘅係，曼聯斟緊國際米蘭中場比列錫。
朗尼喊走大把人要
曼聯球季完咗，摩連奴亦開始放假，呢幾日去咗摩納哥睇F1賽車。有記者撞到摩佬，當然問吓佢今夏點增兵啦，摩佬話：「我乜都唔知。喺三月，我已將想要嘅球員講咗畀活華特聽。佢喺三月已經知道晒我想點，家陣係佢做嘢嘅時間，佢要做到八月先至可以放假，而八月就輪到我要開工。」睇近期嘅新聞，見到活華特密鑼緊鼓搞緊轉會，例如上周六先同中場老將卡域克續約一年。至於伊巴謙莫域今夏約滿，但佢膝部重傷，可能到出年先踢得，應該唔會續約。
朗尼雖然未約滿，但佢今季冇咗正選，連英格蘭國家隊都唔揀佢，所以搞到佢今夏心郁郁想走。咪以為朗尼實力退化就冇人要，據報大把球會想搵佢過檔，最新就有史篤城。報道話，贊助商Bet365科水，想幫史篤城簽朗尼返嚟，錢係唔成問題。不過，朗尼早幾日話，佢喺英超只會踢曼聯同愛華頓兩隊。咁愛華頓請唔請得起佢呢？雖然領隊朗奴高文話歡迎朗尼回歸，但據報「拖肥糖」應該承擔唔起佢份人工。喺外國，美職聯嘅洛杉磯銀河同埋中超嘅上海上港都有意羅致朗尼。
想要基沙文比洛迪
伊巴同朗尼勢離隊，曼聯前線得番拉舒福特同安東尼馬迪爾，所以今夏一定要買番個頂級射手返嚟，大熱人選有馬德里體育會嘅基沙文，仲有拖連奴嘅比洛迪。喺英國時間周日凌晨，《天空體育》爆料，話曼聯同國際米蘭開啟轉會談判，斟介克羅地亞中場比列錫，轉會費大約為3,600萬鎊（約3.6億港元），甚至有意大利傳媒講，曼聯已經同比列錫傾好個人條款。28歲嘅比列錫踢開翼鋒，今季喺意甲攻入10球同有六次助攻，表現唔錯。