基斯坦奴朗拿度（C朗）咁多球迷，一舉一動都廣受關注，好似佢上周四放咗張佢同女友佐真娜嘅合照上網，見到C朗隻手放咗喺佐真娜個肚度，即刻引起網民討論，瘋傳佐真娜有咗C朗嘅骨肉！
C朗嫂簽約做Model
C朗上周四上載嘅呢張相見到，佢着住白色衫同灰色運動長褲，而佐真娜就着咗件小背心。佢兩個坐喺梳化度，佐真娜挨住C朗，C朗左手攬住女友，手掌就放喺佐真娜個肚上面。驟眼睇，只係一張佢哋喺屋企曬恩愛嘅相，而C朗喺相下冇留言，剩係留咗個「心心」。不過，唔少觀察力強嘅網民「金田一上身」，可能又睇得《達文西密碼》多啦，認為呢張相唔係咁簡單，懷疑C朗嘅動作係暗示佐真娜有咗BB喎。C朗近日受逃稅案困擾，如果女友真係有喜的話，可以沖喜一下喇。有啲網民直情喺C朗Instagram度留言問佢，係咪又做老竇，而C朗當然係冇覆啦。
傳搵代母生孖胎
不過，我求大俠覺得網民諗得太多嘞，因為佐真娜啱啱搵到份新工，若果佢真係呢個時候有咗，C朗又點會畀佢操勞呢！西班牙《阿斯報》透露，佐真娜喺今月底同一間模特兒公司簽咗約，嚟緊應該會喺一啲時裝騷度見到佢粉墨登場。雖然男友係大富翁，但佐真娜唔鍾意做少奶奶。佢同C朗一齊初初拍拖嗰陣，係喺馬德里一間名店入面做售貨員，但因為太多狗仔隊同球迷騷擾，先至辭職。之後見佢哋拍拖嘅新聞好似淡咗，就去咗另一間名店度做，點知一樣咁多不速之客嚟搵佢，所以先焗住又再辭職。
報道話，C朗一直覺得一個仔唔夠數，想繼續生，但就唔係搵女友生，而係去搵代母。C朗暫時只得一個仔，就係2010年由代母懷孕出世嘅基斯坦連奴，至今C朗冇透露過代母嘅身份。喺今年三月，英國《太陽報》爆料，話C朗喺美國西岸又搵咗位代母，幫佢陀咗一對孖仔，當時話對孖仔仲就嚟出世㖭。不過，過咗兩個月，暫時都冇跟進報道，唔知呢個消息堅定流。