巴塞隆拿喺今季西甲同歐聯都贏唔到冠軍，不過球隊仲有機會標尾會，喺周六出戰西班牙盃決賽，同艾拉維斯爭冠軍。巴塞球王美斯亦會喺呢場波著新波砵上陣，據講新鞋專為高速度球員製造，美斯著住佢如虎添翼，勢撕破艾拉維斯防線。
美斯呢對新波砵叫做Nemeziz，外表有好多類似斑馬紋嘅圖案，生產商話係專門設計畀最敏捷嘅球員，除咗美斯之外，利物浦巴西前鋒羅拔圖法明奴，拜仁嘅葡萄牙小將連拿度辛捷士同曼聯嘅連格等球員都會著呢對鞋。之不過，唔少網民就認為，呢對似係祖雲達斯嘅專屬波砵多啲，又有人話係支持祖記贏歐聯喎，咁又係嘅，話晒祖記外號就係「班馬軍團」嘛！