「是可忍孰不可忍」呢句說話，唔計行政長官梁振英為咗唔俾立法會議員梁繼昌調查UGL事件而亂咁引用，絕大部份人肯肯定知道有樣嘢堅係「不可忍」，就係人有三急啦。就算好似荷蘭職業單車手杜莫連（Tom Dumoulin）榮譽當前，一樣敵不過呢個「call of nature」，比賽期間要停車泊埋一邊大解！
話說喺上周二環意大利單車賽第16站，總成績領先嘅杜莫連喺呢個222公里嘅賽段剩番32公里時突然停車兼衝落旁邊草地，當時電視評述不虞有詐以為杜莫連壞車，仲為佢擔心咗幾秒，直至見到杜莫連除衫又剝褲先狂呼「Oh No~」，攝影師亦及時轉移鏡頭。結果杜莫連比呢站冠軍尼巴利慢2分17秒衝線，總成績領先次席昆坦拿嘅優勢亦削減至31秒。不過，杜莫連賽後就話呢單嘢真係是可忍孰不可忍：「我喺落山時開始唔舒服，一定要停低解決，根本冇可能繼續比賽。我今日表現媲美最出色車手，原本可以同尼巴利、昆坦拿等並駕齊驅，點知因為呢個問題而落後，實在係sxxt。」
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk