傑志今場着新波衫出戰，呢件戰衣噚日亦都有喺大球場發售；而身為本地三冠王嘅傑志，亦都帶咗港超冠軍獎盃嚟，畀球迷影吓相（圖）。熱刺都設有官方專賣店，今季波衫減價發售之餘，仲有香港之旅特別版tee。
花絮︰藍浪打氣團冇失禮
雖然大部份入場球迷，噚日都係為咗睇熱刺，但傑志球迷都用行動話畀大家知：「呢度係我主場！」坐喺北看台嘅藍浪打氣團（圖），全程都落足力，話畀大家聽咩叫香港打氣文化！
花絮︰「廠迷」超勇踩場
入場睇波着波衫是常識吧！香港球迷就唔一定係着參賽球隊嘅波衫，係屋企有咩就着咩；噚晚見到拜仁慕尼黑、曼聯同修咸頓等，連熱刺死敵阿仙奴都有。呢位勇者（圖）話：「買唔切嘛！都係英超球會啫。」
