基斯坦奴朗拿度（C朗）同美斯貴為當今球壇兩大高手，乜都鬥餐懵是常識吧，勢估唔到佢哋連逃稅都一樣同撈同煲。繼美斯周三因為逃稅350萬鎊被西班牙法院裁定入獄21個月，只係因為刑期屬兩年以下而可以用罰款換取自由，事隔一日又輪到C朗捲入逃稅風波，據西班牙傳媒《El Mundo》報道，西班牙檢控官確認收到稅務機關要求，指呢位葡萄牙球星涉嫌透過將部份肖像權收益轉移至英屬處女島等「避稅天堂」而逃稅，即使喺2014年償還約560萬歐元，仍會審視佢涉及喺2011至14年逃稅高達1,500萬歐元，一旦喺6月底前落實起訴，隨時面臨最高5年刑期！對C朗可謂鬆一口氣係，西班牙傳媒預計以C朗屬初犯，就算罪成都只會判刑約15個月，可望好似美斯咁「以錢代刑」。
C朗今季可謂是非多多，唔計搵代母生仔、同女友佐真娜情海翻波等花邊新聞，最嚴重一宗指控係來自德國《明鏡周刊》聲稱佢以掩口費換取撤銷強姦指控。不過，C朗喺球場內表現未有受影響，繼過去周末領軍重奪西甲錦標，下周末亦會爭取擊敗祖雲達斯衛冕歐聯。