最近馬圈不斷傳出大摩將聘請近年於澳洲發展順利的Tommy仔貝湯美，下季來港做佢馬房主帥。
呢個消息越傳越似真，當然唔會冇道理，皆因就連Tommy仔都在社交網絡平台發出一段自己將在澳洲馬壇消失三年的文字，睇怕呢次大摩重新聘帥有真冇假。
究竟馬房主帥同公司騎師（馬會騎師）有乜分別？馬房主帥就係由馬房自己聘請，佢哋待遇由馬房提供，仲要最少獲馬房85%馬主支持至得，至於公司騎師就由馬會聘請，並獲提供免費住屋。
對上一次主帥出現，為2015年文家良以法國老將巫斯義掛帥。當時文廐每位馬主都要夾大約2,000蚊，而以當時文廐枕住養馬50幾隻計，巫巫一個月基本收入都唔少。
所以，如果馬房主帥唔小心受傷唞足幾個月，又或者好似當年巫巫咁成日被罰停賽，一眾馬主所俾嘅真金白銀，就真係倒晒落海咁滯。巫巫當時最終因停賽太多而不獲續約，並轉往其他地方發展。
大摩點解面對住咁多負擔，做乜都要請Tommy仔做主帥呢？其實有盃王之稱嘅佢當然想搵最有實力的騎師，為自己增添勝算，但係偏偏公認實力最強的雷神莫雷拉屬於公司騎師。雷神唔單止可以於各個馬房之間，揀佢認為最有實力的賽駒嚟騎，而且市場上可以同佢匹敵嘅騎師亦寥寥可數。
不過有Tommy仔就唔使頭痕，因為Tommy仔曾經多次於唔同場合擊敗雷神捧盃，例如於2014年香港經典盃憑「威爾頓」氣走「步步友」勝出，其後再力壓雷神的「軍事出擊」（已退役）攻下女皇盃。
再遠至澳洲2016年昆士蘭打吡，佢亦憑「鷹雄」輕取雷神的「明月青天」，再之後就憑「喜蓮獎星」於今屆董事盃同女皇銀禧紀念盃，先後兩度壓倒雷神座騎掄元。
無論如何，如果Tommy仔真係嚟香港打躉，照計雷神應該都冇咁易繼續壟斷香港賽事。究竟大摩同貝湯美下季以咩姿態出現，遲啲點都會有個答案。