青年新政立法會前議員梁頌恆同游蕙禎，被指舊年11月宣誓風波中同3位議助衝擊立會會議室單案，噚日第二次提堂。代表梁頌恆同游蕙禎嘅大狀郭憬憲出招，話梁游喺終審法院等上訴單DQ案，個法律理據同本案相似，想話要求押後本案等佢哋諮詢吓嗰單DQ案嘅律師團至答辯，但「奶奶」主任裁判官錢禮話睇唔到兩單案有乜關係，唔覺得要押後答辯。
將有20個控方證人
郭大狀申請被拒，梁游惟有同其餘3位被告一齊答辯，5人都否認參與非法集結，同埋企圖強行進入嘅交替控罪。控方話有20個控方證人，同70分鐘錄影片段會播。八方仲知啲證人都係保安、警員、醫生，冇一個係立法會議員。
奶奶將單案訂咗喺7月14日預審，但就預告，因為東區法院冇咁大面積嘅法庭容納咁多人，有可能正式審訊會安排去西九或九龍城法院做。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk