113歲嘅電車繼冷氣電車後，又搞搞新形象，設計咗個全新標誌，用喺電車車身同站牌上面。新標誌係一片洋紫荊葉中嘅電車，色調改為綠色，象徵電車係環保交通工具。而用咗40幾年，由紅藍色電車分岔路軌組成嘅舊標誌，從此成為歷史。
電車迷有讚有彈
網上電車迷對電車換標誌反應不一，有人讚好，但有死硬派就懷念舊標誌。另外，160部電車會喺車頭泵把上面加微笑圖案，配合「笑聲笑聲，滿載叮叮」宣傳口號。
電車公司董事總經理魏文噚日俾記者問到電車會唔會加價，佢就話電車已經6年冇調整過車費，其他公共交通工具都加咗價，而電車成本上升咗，的確有加價壓力，𠵱家仲同政府傾緊。
至於上個月中環電車翻側意外，佢話警方調查緊，暫時無可奉告，但已經加緊偵察電車車速，又重新培訓司機，防止意外再發生。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk