前日有個五歲小朋友問我：「伯伯，點解阿爸成日鬧689叔叔係大話精嘅？」
我答：「因為689鍾意講大話，係人都知啦。」
五歲小朋友此時突破盲腸：「但唔make sense喎，邊有人講大話，講到冚世界都知㗎？如果係咁，佢即係唔識講大話啦。」
我當場語塞。從這角度看，梁振英的確是個不懂撒謊的男人，而觀乎他近日對UGL事件的回應，我甚至可以大膽講一句：梁振英簡直吃了誠實豆沙包。為什麼這樣說？大佬呀，傻姑套叉法都有三招啦，但梁振英只得一招，就係日日咬住梁繼昌，叫佢辭職辭職辭職，五歲小朋友都知想轉移視線。雖則我都諒解，請埋成班廢柴，正所謂「你老母，哪有橋？」，但呢招hea成咁，仲夾硬用足八日，真係「是可忍孰不可忍」。
Hea夠啦CY！我作為觀眾，真係冇興趣再睇梁振英、梁繼昌兩條麻甩佬會唔會有情人終成眷屬。參考連日來各方報導，我覺得整件事關鍵，在於梁振英任特首期間，是否已出售他持有的DTZ日本分公司三成股權呢？若有，他和UGL的後續協議在哪裏？他是否已申報利益？不申報，是否涉及公職人員行為失當？以上問題，梁振英統統迴避。
梁振英反駁梁繼昌，有十三點，我質疑梁振英，只需一點：唔係身有屎，又使咩修改「笨周」呈上嘅文件呢？如果你白過廁紙，點查都唔使驚啦，但梁振英偏要把調查範圍，刻意局限於澳洲媒體已公開的協議，至於他上任特首後一切未公開的後續協議，都不在調查範圍之內。五歲小朋友也明白，疑犯不回答的問題，多屬死穴，他不想你查的東西，就是罪證。梁振英這樣「開誠佈公」，我和小朋友都同意，他應該是全城最可信的男人。