當揭開手提電腦時，聽到電腦的Boot機聲音竟然係夢寐以求名車的引擎發動聲，諗落都興奮！Mercedes-Benz剛剛就在日本發表跟VAIO聯乘合作的手提電腦「Mercedes-Benz X VAIO Z」，除了機身設計用上好多Mercedes-Benz元素，如鋁質機背用激光刻上1954年生產的經典型號300SL或概念車「Vision Tokyo」圖案、TouchPad位置加入廠方商標以及機身鉸位前後都有商標及字樣外，最特別是機身加入汽車引擎發動聲，無論是重新Boot機或者由Stand By模式開機都可以聽到，Mercedes-Benz車迷們應該會好滿足。不過要得到「Mercedes-Benz X VAIO Z」手提電腦並唔容易，雖然在官方網頁有分Core i7/i5及300SL/Vision Tokyo共4款不同版本，但廠方話明合用只生產100部，落單後先至生產，最好6月6日先交到貨，手慢隨時連預訂機會都無。當然限量版價錢唔會平，Core i7型號定價285,000日圓（約$19,935）、Core i5型號定價250,000日圓（約$17,487），比普通版分別貴上約25%，但對車迷來講應屬超值。
資料來源：ITmedia
文：布偉倫
2017果籽繼續認真知味。識買惜用。行以求知。好事多為。重修舊好。
緊貼果籽報道，即like： http://fb.me/AS.AppleDaily