常言道「一登龍門，聲價十倍」，吉利（175）今年2月染藍，噚日舉行股東會，小股東竟然馬拉松式向管理層提問，搞到平時個半粒鐘開完嘅股東會，差唔多兩粒鐘先至結束，公司唔只升價，就連股東會都加時。行政總裁（CEO）桂生悅都話估佢唔到！
噚日其實唔多小股東到場，大約廿人，不過好多人有問題，例如問公司有幾多名員工，會否配合一帶一路發展之類，由於管理層都係內地人，以普通話作答，答完，小股東又話唔明，桂生悅本身係內地人，但廣東話都掂，唯有充當繙譯，結果一問一答一繙譯，就兩粒鐘先至開完會嘞。
會議結束後，幾位小股東唔捨得走，繼續拉住管理層傾多陣㖭。只可以話，公司做咗藍籌股，小股東自然更加關心佢㗎喇。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk