NBA東岸決賽香港時間周五打第五戰，場數領先3:1嘅騎士，只要作客再贏塞爾特人就可以晉級，同勇士再戰總決賽，有望超越米高佐敦（Michael Jordan）成為季後賽累積得分王嘅勒邦占士（LeBron James），就揚言要保持頭兩戰嘅心態。（樂視今日8:30am直播東岸決賽game 5）
要盡快晉級免輸體能
騎士周二以13分之差擊敗綠軍，場數領先到3:1，以頭兩場綠軍主場全敗兼累積輸57分，騎士晉級似乎冇難度，聯盟已經公佈總決賽秩序，首戰會喺六月一號打，騎士更要盡快晉級，避免體力輸蝕畀連勝12場晉級嘅勇士，占士話：「對手已經冇退路，今場一定難打喇，我哋要保持頭兩場嘅比賽心態。」占士喺季後賽已累積5,960分，如果今場拎到27分或以上，就可以打破波神嘅季後賽得分紀錄。佢隊友謝菲遜（Richard Jefferson）就爆料，話占士喺第三戰前病咗，所以先主場輸波，呢場亦係騎士今季季後賽唯一敗仗。