呢排掛住追打梁繼昌嘅特首梁振英，竟然肯短暫離開呢個作戰地？梗係啦，政協有活動喎，今年3月升呢做全國政協副主席嘅佢，點可以唔出席？特區政府噚日下午發出題為「行政長官離港出席政協活動」嘅稿，話CY今日離港到北京以副主席身份出席政協活動，同日返港，離港期間由政務司司長張建宗署任特首。
出稿公佈CY要北上後一分鐘，政府再出另一段新聞稿，話特首要赴京出席基本法座談會，周五離港到北京，以便出席周六（27日）由全國人大常委會舉辦嘅「紀念香港基本法實施二十周年座談會」，並喺會上發言，同日返港。
除咗政務司司長張建宗、終審法院非常任法官陳兆愷外，盛傳都係下屆律政司司長人選嘅律政司法律政策專員黃惠沖都會出席座談會，唔知係咪當埋面試？CY呢次訪京則由財政司司長陳茂波署任特首。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk