意甲會喺嚟緊星期日煞科，祖雲達斯上輪已經鎖定聯賽冠軍，意甲六連霸。教練艾基利固然厲害，近幾季中場鐵三角換晒人，成績一樣保持得到。喺幕後，祖記有位主持大局嘅總經理馬洛達（圖），佢做咗GM有七年，祖記就拎咗六季意甲，將祖記打造成「意甲拜仁」。
喺小弟啱啱睇波嘅年代，意甲仲係百花齊放，冇話邊隊特別強，但今時今日，意甲已經德甲化，祖記成功壟斷。除咗成績外，祖記已經將其他意甲球隊當係兵工廠一樣。羅馬近年進貢比真歷，拿玻里就送上希古恩，而當紅炸子雞保羅戴巴拿就嚟自巴勒莫；情況同拜仁喺德甲狂買多蒙特啲人一樣。祖記今時今日喺意甲咁有霸氣，馬洛達好大功勞，一來佢選帥得宜，干地同艾基利都係佢搵返嚟；二來買人得當，除咗𠱁得掂班爭標對手送上自己當家球星，佢喺其他歐洲勁旅度都執咗唔少筍貨，好似艾拉、丹尼爾、基迪拉。
GM嘅功績除咗睇球隊成績，當然係睇賺錢能力啦！馬洛達入主嘅第一季係10/11球季，當季祖記收入1.54億歐元，全歐排10名以外，少過米蘭雙雄。不過，喺馬洛達帶領下，祖記嘅收入翻一翻，喺15/16球季收入3.41億歐元（約30港元），唔單止係意甲搵銀能力最強嘅球隊，近幾季仲企穩歐洲球壇收入榜前10名。有成績之餘又有財力，兩者相輔相承，互相增強彼此，祖記喺良性增長之中。
如果米蘭雙雄想復興，與其買球星，不如天價請馬洛達返嚟做GM，除咗可以從根本上計劃復興大計，兼且大大打擊祖記。
文：咖喱