前財爺梁錦松冇收到上帝「柯打」參選特首，雖然佢早前表示冇收到林鄭邀請加入行會，但佢對本港公共政策仍然事事關心。噚日出席評級機構中誠信論壇，又大談本港房屋土地政策，向未來政府搵地獻計。
擔任南豐集團董事長兼行政總裁嘅阿松，連佢自己都喺台上話，從事金融業多年，但地產界係新丁，所以甚少就房地產題目演說，今次破例，乃因與中誠信創始人毛振華係老朋友，與中誠信亞太主席李永權係中學師兄弟，人情難卻。
香港成日話冇地起樓，但阿松唔同意，佢話，實情係當局好少全面大規模咁，與公眾同不同持份者，公開討論填海、郊野公園改變土地用途、公私營樓宇比例等題目，即每一個郊野公園係咪都有同樣嘅性價比先？呢啲要研究囉。
佢促請新政府新作風，係時候與公眾就房屋問題，嚟一次各方大融和對話。佢又重提，年輕人冇得上樓、上流（社會階梯向上移）同上位（參政討論），咁樣形勢下，唔上街先奇！
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk