鷹君（041）爭產案，幾兄弟日日輪住出場，外人無法判斷誰是誰非，反正大家又冇份分，純粹剝花生啫。不過噚日「上海姑爺」羅康瑞認真大頭蝦，講完爭產匆匆離場，竟然漏低咗阿女羅寶瑜，要阿女送車尾呀，陰功豬。
話說羅康瑞旗下瑞房（272）噚日喺銅鑼灣一間酒店舉行股東會，爭產風波發生以來，終於到佢表態，佢講完想講嘅嘢之後，再同小股東傾一陣就閃，一出酒店門口，直接坐上等緊佢嘅私家車離開。
羅寶瑜尷尬送車尾
呢個時候，尷尬嘅事發生了。佢位千金羅寶瑜（34歲）做緊同系中國新天地執行董事，亦有低調現身，前後腳跟爸爸走，點知出到酒店門口發現冇車，旁邊又有大班記者想追訪，兵荒馬亂之際，佢追上去爸爸部車，點知送車尾，佢惟有行返轉頭上另一部車走，全程禮貌地封嘴。
羅康瑞雖然漏低阿女，但佢好照顧小股東。佢開完股東會，應付完傳媒提問，係會返去，坐定定同小股東傾偈㗎。
有小股東亦八卦問爭產一事，問羅康瑞會否乘機向鷹君買資產，羅康瑞即刻say no，佢指：「瑞安完全係我自己私人嘅，同佢哋冇關係。」而且，目前情況非常複雜，上市公司交易又非常複雜，獨立董事唔會同意，「呢啲關連交易我哋做唔到㗎！」
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk