亞洲金融（662）總裁陳智思由「特首黑馬」到成為林鄭競選班底，半隻腳長期踩入政壇。適逢林鄭組新班子，但肯入熱廚房嘅人似乎寥寥可數，噚日亞洲金融舉行股東會，就有小股東趁機向陳智思表心聲，問佢究竟會唔會因為加入政府，搞到處理集團業務分晒心。
陳智思即刻當住大家面派定心丸，話大家放心都得喇，佢係唔會加入政府嘅，一定全副心機放喺集團業務咁話。不過有人反對亦有人贊成，現場有小股東就叫陳智思應該「犧牲小我」，捉住佢隻手話，支持佢做特首，又指集團業務都係「小氣候」，佢應該貢獻國家做大事。
所以話呢，陳智思真係有人氣，好似噚日黑雨，都有十幾名老友記小股東堅持去開股東會，衰就衰在，公司送畀股東嘅美食禮券由100蚊縮到50蚊，仲要親身去先有，搞到班小股東好激氣。不過陳智思好識做，轉頭就話派多幾張畀大家。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk