南非新人王20歲騎師麥偉利，唔係猛龍唔過江！今晚（24日）谷草麥偉利作第二日在港出賽，即於第三場四班1200米，夥拍南非練馬師苗禮德的「多多勁驥」，取得個人在港首場頭馬，而此駒季內首度取勝，單Win及組合獨贏A2分別派69及35元。
全港最年輕騎師麥偉利剛周日（21日）沙田日馬在港初試啼聲，出賽五場獲兩殿，這晚移師谷草只騎兩駒，其中「多多勁驥」是其全晚首匹座騎，亦象徵佢首次跑谷草。結果人馬初次合作即擦出火花，「多多勁驥」排7檔沿途前置，直路火速透出以頸位小勝對手，「多多勁驥」累積第五次贏馬，途程清一色為谷草1200米。
苗禮德日前不慎染恙，曾缺席晨課，今晚恢復露面即以「多多勁驥」贏馬。麥偉利賽後表示非常感謝苗禮德和馬主的信任，給予他機會，並指馬兒速度不錯，雖然放不出，但跟得輕鬆。苗禮德謂向來覺得應該給予年輕騎師機會，而且麥偉利非常hungry，渴望取勝，態度積極。由於上次騎「多多勁驥」的田泰安遲遲未落實肯再騎，所以便book了麥偉利操刀，結果人馬發揮令他十分滿意。
第三場二至四名由全場最大冧巴三駒瓜分，10號「紅褲精神」跑第二；11號「好醒」第三；12號「金叻星」第四名，四重彩派二萬七千幾。
其中「紅褲精神」同「多多勁驥」上仗均由田泰安跑第三，呢次安仔揀「紅褲精神」而唔騎「多多勁驥」，結益咗麥偉利開齋。至於雷神亦繼續輸大熱門，「好醒」早段墮後，末段抄出大外叠追唔切，只獲季軍。