【本報訊】鷹君爭產事件爆發兩周，一向被視為中立的四子、瑞房（272）主席羅康瑞終投下震撼一擊，表明鷹君是「肥田有人爭」的爭產事件，大爆關鍵的家族信託權益由三子兼鷹君主席羅嘉瑞「攞最大份」，五子羅鷹瑞亦獲「幾大份」，全由父親決定。他指看不過眼有人對羅嘉瑞攻擊「可以講得話係人格謀殺」，才說公道說話。
記者：方楚茵
昨晚羅老太（羅杜莉君）的傳媒聯絡人向本報表示，羅老太不想家事受公開討論，希望羅氏兄弟姊妹盡快安排家庭會議，又指羅老太過往兩次召開家庭會議，但三子羅嘉瑞、四子羅康瑞及五子羅鷹瑞無出席，故不願聽對方電話。
羅康瑞昨在瑞房股東會後首度開腔，表明對事件失望、遺憾，兩次提到有人擺佈母親告匯豐信託。他指，「有睇過媽媽簽嗰啲文件，做嗰啲錄音，係完全唔想進行𠵱件事（入稟）嘅」，又表明得悉對方有龐大律師團隊，但母親「係一個好慳儉嘅人」，故「相信係有啲兄弟嘅擺佈」。
「信託分配羅嘉瑞最大份」
他形容鷹君是「肥田有人爭」，指家族信託權益由父親、已故鷹君創辦人羅鷹石分配。他指雖近期有兄弟表明無意爭產，但有報道提到媽媽欲拿回資產後重新分配，以往「個信託分配羅嘉瑞係攞最大份嘅！點解呢？因為爸爸係好精明嘅人，佢計算得好清楚認為羅嘉瑞對公司貢獻係最大嘅！」
羅康瑞表明「1980年代初期鷹君碰到好多麻煩，過度擴張同市道唔好，係我爸爸主動叫羅嘉瑞返嚟幫佢」，「（羅嘉瑞）過去30幾年做得好好，一間當時差啲破產嘅公司，做到𠵱家資產淨值超過600億元，可能係肥田有人爭啦」。
他又透露，五弟羅鷹瑞亦獲「爸爸安排佢幾大份，點解呢？父親話『佢照顧我哋兩個照顧得好好，所以畀高啲份數佢』」，又表示對父親1971年借錢予他創立瑞房非常感激。
他強調「有啲兄弟出嚟講說話係冇真實成份，話去控訴匯豐信託係家庭開晒會議、有好多文件，我一張都未睇過喎！」他又指「1980年代，我爸媽一齊將股票擺畀匯豐，係全權託管！匯豐係全權託管，所以啲報道話匯豐係唔聽我媽媽指示，我相信法律上唔係好可行」。
談到97歲的羅老太時，他指媽媽仍維持健康、頭腦可以，但對「法律同公司管治一定係外行」，前陣子仍能聯絡母親時，媽媽經常向他指「好難做，做咗磨心，手板係肉，手背又係肉，佢會點算呢？」他明確希望，「兄弟係咪可以靜落嚟諗一諗，係咪將我哋97歲嘅媽媽擺上去一個咁樣嘅位置去打官司？」
接近鷹君消息人士指「正如羅康瑞所講，羅嘉瑞亦冇收過電郵通訊」。接近羅啟瑞消息人士指，據了解羅嘉瑞及羅康瑞聘用同一律師，「所以冇話咩中立」，又提到「啟瑞作為最細，唔知點好」。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk