一帶一路一帶一路，近期已經成為香港高官開口埋口嘅用字，好似香港冇咗呢條路呢條帶就會死咁。講真，強國以前甚麼口號式工程，長三角、珠三角，到幾年前甚麼開發大西北，今時今日又有幾多成真。不過貴為絲綢之路終點，意大利人由馬可勃羅開始，都深明做生意緊要，有人送錢上門，又點會介意收，甚至貴為國家最自豪運動之一嘅足球，米蘭兩大球會都落入強國手中。
其實祖記王朝之前，米蘭雙雄何嘗唔係壟斷意甲，2010年國米做三冠王，2011年AC就有伊巴爆珠下封王，點知𠵱家就越輸越遠，祖記六連霸，AC同國米就只排第六同第七，國米更加歐霸盃都冇得玩。米蘭雙雄比較之下，似乎國米正氣啲，始終買咗國米嘅強國電器零售集團真係幾有規模，國內都搞多隊江蘇蘇寧玩中超，江蘇啲外援好似拉美利斯、阿歷士泰斯拿等去意甲踢都夠班㗎。
不過強國作風今季都搞死國米，蘇寧入主後就炒咗文仙尼，搵法蘭迪保亞返嚟教，不過唔夠三個月又炒迪保亞，搵冇咩名氣嘅派奧利接手，都知道佢冇運行，結果季尾再炒，𠵱家又用韋基做看守教練。國米本身班兵唔係差，阿根廷前鋒莫路伊卡迪喺意甲夠殺，比列錫、波索域等東歐兵都叫實際，最大問題係冇好教練，就好似冇好船長咁，架船自然沉。國米近期不斷搵施蒙尼、干地等冠軍級教練，人哋本身教得好地地，出更高人工都撬唔走啦，其實意大利名帥都唔少，卡比路（圖）俾俄羅斯炒完都冇着落，國米不如諗諗佢啦。文：牽牛