【本報訊】羅氏家族四子兼瑞房主席羅康瑞自立門戶多年，據其描述與母親羅杜莉君（圖）感情非常好，「一般如果我冇見佢一個禮拜，佢肯定打嚟鬧我」，但「我𠵱家希望佢打嚟鬧吓我，因為我真係同佢失去聯絡」。
瑞房昨舉行股東會的銅鑼灣富豪酒店，正是盛傳羅老太現居之地。羅康瑞坦言與母親失去聯絡逾月，雖有指母親居於樓上，惟「𠵱家打電話揾唔到佢，我亦唔想尷尬，話佢住喺呢度樓上，（上去）會有保安嚟攔住我，我相信𠵱家以我嘅心情，我真係會郁手㗎！阻住我見我媽媽！」
「要鬧嘉瑞使乜寫信」
他又指，日前母親「發公開信去鬧羅嘉瑞對佢係好唔公平」，並提多項質疑「我媽媽如果要鬧羅嘉瑞，佢使乜去寫信？叫佢嚟鬧咪得囉，會唔會需要揾醫生同律師？同需唔需要揾人影相畀人睇到佢揸住封信？如果係佢親手寫，佢唔使睇啦」。
他反問「點解要公開一封咁嘅信呢？點解要話羅嘉瑞不孝呢？我睇到封信，個語氣唔係我媽媽㗎」。他指，97歲的媽媽仍算頭腦清醒，相信是五弟、即心臟科醫生羅鷹瑞功勞。最近有指兄弟找其他醫生照顧媽媽，「𠵱個我冇反對，但我希望羅鷹瑞可以繼續照顧我媽媽」。
69歲的羅康瑞1970年起已任鷹君董事，他在1971年向父親羅鷹石借10萬元創立瑞安建築公司，現時瑞安集團旗下有瑞安房地產、瑞安建業兩間上市公司，市值合共近145億元。由於瑞安系在上海有大量投資，他亦被稱「上海姑爺」。羅康瑞現時為貿發局主席，被外界視為「梁粉」，太太是被稱為「最美麗港姐」的朱玲玲。
■記者方楚茵
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk