【《蘋果》專訪】無綫劇近年被觀眾插爆冇新意、製作求其，但由宣萱和林文龍主演的劇集《不懂撒嬌的女人》成功帶出迴響。與郭可盈育有一女的林文龍，08年拍完《法證先鋒II》後離無綫向外闖，試過北上拍劇，也試過轉投王維基旗下的港視，去年受無綫高層杜之克（Felix）邀請參演《撒嬌》，終於回巢。
魚過塘才肥
重返無綫的林文龍日前在尖沙嘴受訪，他謂以往不少無綫演員大呻拍劇時間過長，閒閒哋直踩26、27小時：「TVB營運模式係外景接廠景，廠景接外景，幾日幾夜唔瞓好普通，事實上無論係18、22歲又好，60、70歲都好，係需要時間休息，除咗調整精神狀態，亦要返去做功課，唔係機械式咁啤、啤、啤出嚟。一日排你十幾二十場戲，做得唔好，想NG都唔得，因為仲有好多場要拍，所以咪影響質素。」
這次《撒嬌》開工，演員就有8到10小時休息，林文龍指演員與導演都有充足溝通。他近年接戲重質不重量：「大前提要有好劇本，拍埋啲咁上下嘅劇情同角色，我係唔會返去，我同關樹明（監製）又係咁講，Felix都係咁講。我離開咗TVB九年，如我淨係求拍嘢，根本唔應該走。」林文龍外闖，魚過塘變肥：「今次係一個好大加幅，好大尊重，以前TVB同你傾約，加你嗰一百幾十，好似皇恩大赦。問心講，如果我一路留喺TVB，可能拍到我80歲死嗰日，都唔會有呢啲錢。」
嘆青黃不接
林文龍回巢吐氣揚眉，他說：「呢行需要你，就算瞓喺棺材俾啲釘釘實，佢都會想辦法搵番你出嚟；當佢唔需要你，就算每一日有記者會，日日喺鏡頭前面行過，都會剪走晒你啲嘢，好現實。」他認同娛樂圈幕前幕後青黃不接：「想學都冇人畀你學，未畢業就出嚟做男、女主角，一套劇未完就開下一劇，唔好話休息，連做功課時間都冇，佢可以做到啲乜嘢？」
採訪：何慧斯
服裝提供：agnès b.
場地提供：The AIR（The ONE）