大美人李嘉欣同家姐李嘉明同樣樣靚又有氣質，其實華人圈中都有唔少靚女姊妹，有啲好似嘉欣姊妹咁一個係圈中人一個唔係，但亦有同樣喺圈中打拼嘅，各有各精采。
圈中其中一對最知名嘅姊妹花，必數米雪同雪梨。米雪於1969年已經進入邵氏影視藝員訓練班接受演員訓練，其後更帶埋妹妹雪梨入行。當年得17歲嘅雪梨為徐少強未婚生子，米雪視姨甥仔女如己出，照顧有加。最勁囓係現年61歲嘅米雪唔單止keep得好，而且仲好做得，至今仍有為大台拍劇，包括呢排播緊嘅《心理追兇》同拍攝中嘅《深宮計》同《溏心風暴3》，而雪梨都仲有喺娛樂圈發展，包括演出Viu TV嘅《三一如三》，只係相對地較少曝光。
而同樣係兩姊妹孖住上喺圈中打拼嘅，有前組合2R成員Rosanne同Race，Rosanne喺09年嫁咗畀牙醫男友白恩庭後，專心相夫教子做少奶奶，妹妹Race情路雖然唔係太一帆風順，但佢喺舊年11月再婚，嫁畀新加坡生意人David，並喺今年情人節宣佈陀B。
同2R一樣做過歌手嘅官恩娜（Ella），雖然近年已少現身於幕前，但睇番佢啲相，原來佢妹妹官恩沂都係美女一名，4年前，官恩沂喺紅磡開珠寶店，做家姐嘅Ella當然有去支持兼做生招牌，官恩沂雖然同家姐唔叫餅印咁似樣，但一樣係長頭髮眼大大嘅典型美女。
至於近年忙於搞生意嘅前華姐楊秀惠，曾經喺社交網站貼自己同兩名妹妹嘅合照，同樣係靚女，其中一位胞妹楊秀靈多次被拍到來港同家姐團聚，而佢亦有來港協助家姐打理生意，靚女得嚟仲非常幫得手。
此外，去到對岸嘅台灣，同樣有好多出名嘅靚女姊妹花，其中S.H.E嘅任家萱（Selina）同妹妹任容萱就係其中一對。雖然呢兩姊妹年齡相差7年，但睇落兩個都好養眼吓，身高嗰啲都差唔多。