外號喼神(英文姓氏Gibson)的高伯新都算犀利，由原本全面告急，變做就快上岸，堪稱今季最神奇練馬師。
這晚（24日）谷草開場前，喼神有13場頭馬，一開場佢即於頭場五班一哩由梁家俊贏落飛馬「紅旗飛將」，變成只需贏多兩場，就夠16Win之馬會最低達標要求。而「紅旗飛將」單Win及組合獨贏A2分別派56.5及29.5元。
五歲新西蘭自購新馬「紅旗飛將」初期由告東尼訓練，上季初轉至高伯新後，只贏過一場泥地1200米打開服役勝門，今季原本屢戰屢敗，惟上次跑第二只輸馬頭位俾「大爆發」屈居亞軍，表現顯著復蘇。今次「紅旗飛將」再跑五班谷草一哩，亦再配梁家俊，沿途跑主動，順利於濕滑場地上一放到底，大勝3.5馬位，打開季內勝門。
高伯新表示「紅旗飛將」今仗排12檔，形勢非常不利，但梁家俊發揮出色。向來cool爆的高伯新心情靚爆地說：「梁家俊今仗的發揮好過雷神莫雷拉，排大外檔但他一早切入，跑得一絕！」而雷神以往並未騎過「紅旗飛將」。
頭場由最熱三駒包辦三甲，當中「紅旗飛將」臨尾着綠燈變5.6倍第三熱門，結果幫到落飛黨中正大注獨贏，佢哋中埋「紅旗飛將」與次熱跑第二的「隨時候命」構成之14倍綠燈Q。第三名為大熱門「友瑩采」；第四名是冷馬「辣得寶」，四重彩派近一萬元。