立法會建築、測量、都巿規劃及園境界前議員謝偉銓（Tony），入班做發展局局長嘅消息傳得好勁，但佢至今仲未向外確認，若然真確，又令專業及資深行政人員協會水漲船高咯。
話說現屆班子中，律政司司長袁國強、財經事務及庫務局局長陳家強、食物及衞生局局長高永文以及財政司長陳茂波都曾經擔任專資會理事，民政事務局副局長許曉暉同創科局副局長鍾偉強同樣係成員，所以建制圈內視專資會為司局長搖籃；而Tony不單係專資會前會長，更係創會核心成員，難怪佢盛傳出任局長嘅消息令專資會成員大為振奮，覺得身價又倍升，唔知會唔會有爭住入會潮？
八方問過專資會創會會長容永祺，佢話對於Tony盛傳做局長好開心，話創會宗旨就係為香港發掘同輸送高質素人才，謙稱會員本身已經好有條件，「我哋係畀個平台佢哋，等政府睇到佢哋嘅理念、能力同經驗等」。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk