啱啱先重奪西甲錦標嘅皇家馬德里，奪冠兩日後已喺轉會市場出手，宣佈同巴甲法林明高達成協議，收購有「新尼馬」之稱，年僅16歲嘅前鋒雲尼斯奧斯。佢簽約後會繼續留效法林明高，到2019年夏天先去皇馬報到，如果雙方球會都同意，亦可提前將佢收歸己用。
皇馬咁急簽呢位巴西仔，據講其中一個原因係驚俾巴塞隆拿捷足先登，唔想錯失尼馬嘅情況再發生，而咁啱呢位雲尼斯奧斯亦被譽為「新尼馬」，過去三年先後帶領巴西U15同U17稱霸南美錦標賽，兩屆賽事都係神射手兼MVP，據聞轉會費高達4,500萬歐元。
呢個亦係皇馬買人禁令解除後嘅首單交易。皇馬因之前違規簽未成年球員，本來被罰到明年先可以買球員，但獲減刑後今夏已獲准再簽番球員。
另外皇馬雖喺西甲封王，但按規矩要到下季先可以親手高舉獎盃，片段影到球會職員話畀加里夫巴利同莫迪歷聽時，兩人好愕然，而巴利再講畀基斯坦奴朗拿度聽，後者竟爆粗話係天大嘅笑話，諷刺呢套西甲傳統。