外號喼神(英文姓氏Gibson)的高伯新，雖唔算神級練馬師，但佢最近兩個月展示神級後勁，其間共勝出11場頭馬。
這11場頭馬，包括今晚（24日）谷草起孖，先由梁家俊贏頭場「紅旗飛將」，繼而第六場三班一哩，以潘頓執韁的「文藝學家」揚威蘇特恩盃，錄得個人季內首次起孖兼捧盃。「文藝學家」單Win及組合獨贏A1分別派31及18元。喼神今季頭馬已增至15場，再贏多一場就夠16Win達標安全線。
五歲愛爾蘭自購馬「文藝學家」前仗起初跑谷草一哩，並由當時開始變換配備，首戴面箍出賽，結果該仗由蘇狄雄跑第三。上次潘頓接手沿途包尾，末段以炮彈式後勁逢馬過馬，於同程打開在港勝門。
今場「文藝學家」班次、路程、騎師皆不變，沿途守第五位，唔使追得咁辛苦，拉士百幾米開始發力上前，於潘頓左手力鞭下贏0.5馬位，從而取得連捷，累積3戰谷草1650米得2冠1季；亦令潘頓強勢保持今個月每個賽日例有馬贏，包括上周六（20日）客串澳門中三元。
高伯新表示「文藝學家」是他今季最有信心的頭馬，賽前覺得此馬sure win冇得輸，唯一少少擔心場地起變化 ，加上全晚利放不利追，不利「文藝學家」的後追跑法，好彩潘頓發揮一絕，騎得非常出色，值得一讚。
潘頓衛冕蘇特恩盃，上屆他夥拍「變出美麗」取勝，而上屆跑第二的「精壯神駿」（現屬高伯新馬房）練馬師沈集成，今年此盃以「琪麟穎」跑第二；三、四名順序為「雷公鑿」及「怡德」，四重彩派4,831元。三T正獎有人中，每注派54萬幾。