候任特首林鄭月娥嘅班子大致敲定，焦點（定爭議點？）應該係盛傳同林鄭不咬弦嘅謝偉銓或放下恩怨入閣，其他外來人選仲有民主黨大腦羅致光，據知CK極有可能會搞番佢最熟悉嗰瓣，即係勞工及福利局，有民主黨中人則話對方好似仲未申請退黨！
與此同時，另一CK亦登場，佢負責掌管公務員事務局，此CK唔單止英文名縮寫同彼CK一樣，而且仲要同樣係姓羅，兼且中文名讀音都一樣，唯一唔同嘅係民主黨CK係羅致光，呢位CK則係羅智光。據知年近60𠵱家擔任保安局常任秘書長嘅CK Law，極有可能脫離公務員之列加入熱廚房。
有政界中人都笑稱，估唔到林鄭班子得嗰三司十三局，竟然都有兩個人係撞名噃，而且兩人都係戴眼鏡兼頭髮有啲花白，以後真係要小心分清楚喎。
屢因撞名鬧笑話
就連羅致光好多年前都喺報章專欄講過，因為同羅智光同名而鬧出不少笑話，包括有人誤以為點解時為民主黨副秘書長嘅佢，做咗董建華私人秘書？亦有報館記者出席一次採訪，到場後先知悉請嘅嘉賓係佢呢位立法局議員而唔係時任副教育統籌司嘅羅智光；有次佢哋一齊出席立法局會議，主席點名發言，佢哋都要先搞清楚係叫邊個先。
羅致光仲親自解構兩人名字之別，話羅智光係「聰」明到發「光」，佢則係唔夠光所以要「羅致」啲「光」嚟補一補喎，相信佢都估唔到，有朝一日竟然會同對方站在同一陣線咯！
李八方
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk