日本丸龜製麵母公司Toridoll Holdings以10億港元，收購譚仔雲南米線母公司「同心飲食」成為城中熱話，多位專欄作家都評價過呢頭親事，我倒想講講投資者或大財團收購的基本原理。
首先要清楚買家的收購動機為何，普遍動機如下：（一）增加市場佔有率，食埋同類型對手，以增加市場議價能力；（二）增加產品種類，例如百事公司收購擁有佳得樂母公司Quaker Oats；（三） 財技， 以高市盈率（PE）母公司收購低PE子公司，以增加母公司市值及提升股價，吸引投資者目光；（四）行業轉營，舊式行業轉型新興行業。另有其他千奇百怪動機不能盡錄。
想吸引投資者收購的，首先要在行內「起朵」，甚至做到業界的一哥，而且盡企業的社會責任如實報稅，公司PE低自然能提高議價能力，識幾個banker朋友放吓聲氣更好。
話說有位朋友，他在廣告界做到出晒位，其有份經營的廣告公司，在成立7年後用10倍PE成功出售，收大嚿錢落袋買田買地遊山玩水，過冷河後，又開展另一新項目重覆同樣過程，賺另一筆真銀。最緊要是真材實料，因為進入Due Diligence（DD）起底程序就乜都俾人起清起楚，就算生意興隆都未必一定成功。
生意複雜難發圍
另一朋友在電腦行業做到頭一、二名，生意額過億，不停有中間人叩門話可以助他上市或找買家高價收購，個個一開始都講到十拿九穩，但坐低一了解，多則幾個星期，小則只花一餐茶時間就離場，遠遠未去到DD階段。
問題在於其生意模式的可持續性，涉及多個國家經營及法律問題，相當複雜，若然毛利率過低，或家庭式經營賬目混亂都會嚇跑買家，之後個個都話：「有得搞嘅，你執靚盤數，簡化個生意模式再搵我。」但公司經營手法已成習慣，不易撥亂反正，只有繼續在水中浮沉，不知何日到中環。
若然在上市與被收購之間作選擇，係人都知上市威威而且個殼值7億，與被收購無得比，但我覺得各有所長。要上市，自己要出幾千萬使費博一博，不成功就付諸流水，搵金主出資都得，但成功後水瓜打狗唔見一大截，做個有名無實的上市公司主席，雖勝猶敗。被收購無風險成本，公司查數都是買家負擔費用，而且一次過賺十年廿年的錢，做生意都是求低風險高回報。
譚仔創辦人譚澤均和周志明由食店老闆變億萬富豪實為飲食界傳奇，理論上一次過賺十年的米線錢，還免除十年經營風險和時間。聽聞除了丸龜母公司，還有有幾間本地及外國財團競爭，所以作價理想。原來小小一碗米線做得好都咁多人爭，其實爭乜吖，溝埋一齊做讚岐米線喇。
郭釗
http://www.fb.com/heaology.edu
本欄逢周四刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk