「人生中遇上逆境，可以叫人一蹶不振，但亦可以成為令人成長的重要契機，關鍵在於有沒有人願意伸手相扶。年輕人今天或許在學業上跌倒了，我深信只要家庭及社會堅持相信年輕人擁有潛能，並給予耐心、愛心、支持與機會，每一個折翼的孩子必能夠再次起飛。」呢段說話係《折翼的孩子能飛》嘅序言，大家估唔估到係出自新地前聯席主席郭炳江之手？
查實呢本書嘅作者係「師徒創路學堂師生」，師徒創路學堂係乜東東？原來係新地同突破機構合辦嘅計劃，當年由郭炳江同蔡元雲傾成，主要為讀書成績差嘅學生提供實習機會兼生命教育，至今逾300名學生受惠。
基煇以同一番話勉爸爸
新地執行董事郭基煇噚日撐場主持開幕禮，自言幾年前由爸爸手上接過計劃，當時與家人身處逆境，佢要向學員演說，苦思講咩好？搵番《折翼》呢本書，見到爸爸寫嘅序言好大感觸，即刻去信獄中嘅爸爸，用同一番話鼓勵對方，「佢好開心，我話：『估唔到佢鼓勵人會鼓勵番自己』。施比受更為有福。」
首屆計劃2003年舉行，當年學員包括汪蔚宗、顧建輝，佢哋當年會考分別得5分同1分，汪實習完後留喺新地工作，𠵱家係客戶服務主任，而顧實習後投身社福界，作為導師嘅董事黃天厚自言同班年輕人關係好密切，汪蔚宗係佢首次任導師嘅學員，當正自己仔女咁，見證對方結婚生仔。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk