現時香港馬圈一人獨大，冠軍騎師雷神莫雷拉，就算偶然一兩匹馬發揮欠佳，但如果他要求再騎，馬主、練馬師十之八九都不會換人，相反其他騎師如搏輸明星馬，帥權就難免危危乎了。
大摩馬房的全港最高分三歲馬「駿皇綵」，本月7日配老拍檔韋達，角逐二班1000米直路賽，賽前四出四捷，因此被捧成2.4倍頂頭大熱，力爭五連勝，馬兒外檔起步早段留住跑，豈料拉士發力時全面受阻，韋達左抽右避亦冇晒符夾硬收慢，到有位望空之際已經到終點，僅僅保番一席季軍位置，非常黑仔。
「駿皇綵」上仗之敗責任不一定在韋達，但賽後至今大摩未再安排韋達在晨課沾手此駒，卻是事實。本周一更已換上另一騎師田泰安，在草地跑道操練。田泰安亦已證實，自己將在周日(28日)夥拍此駒爭國際三級賽1200米沙田銀瓶。「駿皇綵」在此賽負113磅，其實無論如何，韋達都造不到磅，相信他目前只希望大摩不是借勢換人，心願梗係日後有機會騎番啦！