要講上市公司模範夫婦，謝瑞麟（417）嘅靚太主席謝邱安儀（Annie）同老公謝達峰（Tommy）肯定有份。每逢出席業績會，Annie都習慣着一身套裝，女強人打扮，但一講起佢老公喇喎，就即刻笑得甜絲絲咁，真係隔空都俾佢「閃」親呀！
話說Tommy舊年調任為謝瑞麟副行政總裁，理應幫Annie分擔唔少工作。噚日Annie出席業績會，被問到老公係咪好勤力工作，佢即係笑笑口話係，仲話自己同老公雙劍合壁，有乜難題都搞得掂。嘩，呢個時代仲有人講雙劍合壁，好骨痺呀。
講番轉頭，今年係謝瑞麟上市30周年，公司3月時已經搞咗個大party，兼且同創辦人謝瑞麟慶祝80大壽。Annie話，慶祝活動應該差唔多，年內應該唔會有大型慶祝活動喇。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk