今季英超已經曲終人散，係時候分錢。車路士贏到冠軍，加埋電視轉播收入，總共收得1.53億鎊（約15.5億港元）冠絕英超；至於邊一隊緊隨車仔之後？原來唔係亞軍熱刺，而係被列為下季奪標大熱嘅曼城。
干地獲頒最佳領隊
雖然季前被稍為睇低，但車仔贏到英超冠軍都算係實至名歸，領隊干地亦啱啱喺周一英格蘭聯賽領隊協會（LMA）晚會度再得獎，獲頒LMA年度英超最佳領隊獎項。
一季英超又玩完，埋單計車路士一共獲得1.53億鎊總獎金。總獎金分三個部份，一份係保證分成8,440萬鎊，隊隊一樣；其餘就係根據積分榜排名遞增嘅獎金，車路士拎冠軍分得最多有3,800萬鎊；最後就係根據英國當地轉播場數分出嚟嘅電視轉播收入，車仔再收三千幾萬鎊。另外，隊長泰利日前接受訪問，話聽完林柏特同加歷查畀佢嘅意見之後，仲十五十六未諗定踢唔踢落去，話唔埋最後決定唔退役住踢多季。
而曼城雖然得季軍，但總獎金就多過亞軍嘅熱刺，有1.49億鎊。主帥哥迪奧拿喺球季結束後都仲未有假放住，要去阿布扎比「面聖」，向班主蒙蘇匯報今季工作。另外，據西班牙報道指，哥帥妻女於周一有前往觀看發生爆炸恐襲嘅Adriana Grande演唱會，幸好冇事。曼城今季只排第三，但外國博彩公司相當睇好佢哋，開出17/18球季英超奪標賠率3.25倍大熱。