現年29歲嘅陳庭欣雖然貴為2010年港姐冠軍，可惜星途一路平平無奇，緋聞反而老是常出現，由同翟威廉甜蜜蜜到因有米大狀唐偉倫介入而令到關係變得複雜，到最後正式玩完，劇情可謂峰迴路轉。
而有做開《東張西望》主持嘅陳庭欣，因為舊年口快快講錯一句「食燈籠，玩月餅」，瞬間彈出，成為網民一時佳話，到今時今日仍然被網民不時「回帶」。
至於演藝事業方面，雖然陳庭欣參演過10套以上劇作，但最為人熟悉嘅大概就係舊年大台台慶劇《致命復活》，首集無耐就被人「一秒強姦」，仲要棄屍荒野，令網民嘖嘖稱奇，就連佢自己當時接受訪問時都話：「覺得自己比想像中死得快，因為拍死嗰場戲嗰日，喺越南凌晨坐六、七個鐘頭車先去到拍攝現場，個妝又化得耐，我手腳都要塗血漿，好辛苦。」