𠵱家有公屋，見auntie就算冇雞脾，都一定有雞翼食！有後生仔女一夠18歲就用盡方法排公屋，到今年成為上班族幾年，夠期結婚，又有單人公屋，可以用綠表買二手居屋，浸淫係大家嘅羨慕目光，以為完全係人生大贏家呀？點知，原來綠表只係一張「扑傻瓜」遊戲嘅入場券！
Christine 今年底同男朋友Roy拉埋天窗，諗住男朋友有公屋綠表，今生今世都應該唔使再為層樓煩惱，買二手居屋實食無痴牙啦，住屋唔使再擔心，實係開心快活人。
「傻豬豬，我哋去睇居屋啦，我阿爸阿媽話可以幫下手，我哋目標港島400萬以內居屋啦好冇？」Roy雄心壯志，諗住一定得，同女朋友Christine 一齊進入「扑傻瓜」遊戲。
第一間鰂魚涌4xx呎居屋，上年今日賣300萬，今日叫價350萬，都可以接受，Roy同Christine睇完覺得幾好，返屋企再計計計計，計到爆頭、計到爆血管，Ok，去馬，「傻豬豬，我哋不如買囉」，點知一say yes，業主話400萬，無4字頭唔賣。Ok，揀第二間。
第二間，筲箕灣差唔多大細居屋，綠表叫價380萬，無問題，樓齡新，買二手居屋仲可以做95按揭，「傻豬豬，我哋......」Roy嘢都未講完，經紀已經打電話嚟話：「440萬，業主話起碼430萬先好搵佢傾」。
第三間、第四間、第五間。。。「傻豬豬......」Roy同Christine已經陷入一個十八層輪迴大地獄，搵樓、睇樓、加價、唔到「傻瓜價」唔肯賣。
未補地價、綠表買二手居屋，每間開價貼近自由市場價，所有二手樓盤只係「裝飾放盤」。
上年如果有綠表，買二手居屋其實好有so，二手市場仍然百花齊放，今年業主唔急賣，既然政府已經整死咗二手市場，無晒供應一潭死水，咁咪綠表樓當白表樓賣，只要有「傻瓜」肯出價。
綠表資格，喺變態樓市下，都變成雞肋，自動放棄精心得來嘅「優惠資格」，定買白表樓？
Melody
http://www.facebook.com/whichroad
本欄逢周三刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk