康宏金融行政總裁（CEO）莊偉忠舊年暑假心臟病發，雖然一個月後已經復工，但其實佢仍處於康復階段，口齒唔多伶俐，所以大家一直唔見佢做傳媒訪問。不過，佢最近終於「復出」嘞，頭炮係幫自己公司賣廣告，喺一段30秒嘅廣告片入面，講咗大約5秒嘅對白咁大把！
聽講，康宏原先冇考慮叫莊偉忠出鏡，反而係廣告公司負責人力sell，認為公司既然請得呢位網民勁like嘅人做CEO，冇理由唔搵佢做埋代言人，喺廣告中客串一角，反正佢人工包埋，公司唔使另外畀錢，一舉幾得。講到咁，莊偉忠自然冇得推喇。
條廣告片嘅意念確係幾得意，用日本綜藝節目做背景，再講啲人買理財產品時，通常都係羊太羊生，興乜買興，或者做保險嘅朋友叫買就買。最後就係莊偉忠梳靚個頭、着得整齊咁扮理財專家，叫人要有精明眼之類喇。暫時見到呢條30秒片，佢大約有5秒對白，佢慢慢講，未返去以前妙語如珠嘅狀態，但清楚嘅，睇落亦好精神。
呢位傳媒甜心，大病前對住傳媒有問必答，家陣睇佢應該康復得七七八八，估計好快可以重投傳媒懷抱，做十個八個訪問都冇乜問題喇。講開又講，聽講廣告公司負責人同導演都係莊偉忠粉絲，難怪拍得佢幾靚仔。
李華華
mailto:[email protected]
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk