特首梁振英早排未忙於追打梁繼昌時，曾經聲稱香港污染物會被南風吹至廣東等地，連累內地有霧霾，但係港人只埋怨吹北風時吹咗廣東污染物落嚟，天文台前台長李本瀅其後一度撰文反駁，指「政府不重科學，欠科學常識」，事件搞出大風波，李其後撰文澄清唔係指摘特首唔科學。
事隔大半個月，李本瀅再喺網誌講空氣污染，特別之處係佢玩自嘲：「欠政治常識的我，只能繼續說科學常識。」佢話香港空氣污染量不時超標，港人總不能禁足外出，因噎廢食，有見英國廣播公司（BBC）嘅短片教路人點樣減少吸入污染自保，佢都綜合短片建議招數提出七招，包括走小巷、遠離大車、走車輛落斜那邊的行人路、避免走高速公路旁、走無簷篷的行人路、避免住在低於高速公路的樓層及戴面罩。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk